នៅរសៀលថ្ងៃទី១២ ខែសីហា ឆ្នាំ២០២៥ ព្រឹទ្ធសភានៃព្រះរាជាណាចក្រកម្ពុជា បានរៀបចំសិក្ខាសាលាស្តីពី សេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ដែលអ្នកចូលរួម ១២០រូប រួមមានសមាជិកព្រឹទ្ធសភា តំណាងគណៈកម្មការទាំង១០នៃរដ្ឋសភា តំណាងគណបក្សនយោបាយ តំណាងគណៈកម្មការជាតិរៀបចំការបោះឆ្នោត តំណាងក្រសួងមហាផ្ទៃ តំណាងក្រសួងយុត្តិធម៌ តំណាងសម្ព័ន្ធភាពជាតិសមាគមក្រុមប្រឹក្សាក្រុង ស្រុក ខណ្ឌ ឃុំ សង្កាត់ និងតំណាងក្រុមប្រឹក្សាសាកលវិទ្យាធិការនៃកម្ពុជា។
ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានគណៈកម្មការពិសេស ដើម្បីសិក្សារៀបចំ សេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា អមដោយឯកឧត្តម លោកជំទាវ ជាអនុប្រធាន និងសមាជិកនៃគណៈកម្មការពិសេស បានធ្វើបទបង្ហាញពីលទ្ធផលនៃការសិក្សាស្រាវជ្រាវ ដោយចែកជា ៤ផ្នែកសំខាន់ៗ រួមមាន ១)ប្រវត្តិនៃការរៀបចំ និងការប្រព្រឹត្តទៅរបស់ស្ថាប័នព្រឹទ្ធសភានៃព្រះរាជាណាចក្រកម្ពុជា ២)ប្រព័ន្ធបោះឆ្នោតព្រឹទ្ធសភានៅជប៉ុន ម៉ាឡេស៊ី ហ្វ៊ីលីពីន ថៃ ឥណ្ឌូនេស៊ី ៣)ប្រព័ន្ធបោះឆ្នោតព្រឹទ្ធសភានៅបារាំង អង់គ្លេស អាម៉េរិក កាណាដា និងអូស្ត្រាលី និង ៤)សេចក្តីព្រាងសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា។
អង្គសិក្ខាសាលា បានលើកជាសំណួរ និងមតិចូលរួមជាច្រើន ដើម្បីផ្លាស់ប្តូរយោបល់ បទពិសោធ និងព័ត៌មានជុំវិញសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា។ អង្គសិក្ខាសាលា បានបង្ហាញពីការចាប់អារម្មណ៍ និងវាយតម្លៃខ្ពស់ចំពោះលទ្ធផលនៃការសិក្សាស្រាវជ្រាវ របស់គណៈកម្មការពិសេស រហូតរៀបចំបាននូវសេចក្តីព្រាងសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភានេះ។
គួរបញ្ជាក់ផងដែរថា ចាប់តាំងពីថ្ងៃទី១ នៃនីតិកាលទី៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានលើកឡើងពីអាទិភាពចំនួន២ ទី១ គឺការពង្រឹងគណនេយ្យភាពជាមួយអង្គបោះឆ្នោត ដែលសំដៅឱ្យសមាជិកព្រឹទ្ធសភាត្រូវចុះជាប់ជាប្រចាំនៅមូលដ្ឋាន និងទី២ គឺពង្រឹងវិស័យការទូតសភា។ សេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ត្រូវបានរៀបចំឡើង ដើម្បីពង្រឹងគណនេយ្យភាព និងការទទួលខុសត្រូវរបស់សមាជិកព្រឹទ្ធសភាជាមួយអង្គបោះឆ្នោត ដែលនេះនឹងជួយលើកកម្ពស់ប្រសិទ្ធភាពការងាររបស់ព្រឹទ្ធសភា។
ខ្លឹមសារ៖ ខុទ្ទកាល័យឯកឧត្តមបណ្ឌិតអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
